رنامج / ذاتي حياتي .. / شخصيات الحب ( 2 ) ..

برنامج / ذاتي حياتي ..
دروس / شخصيات الحب ( 2 ) ..

👤👓👤👓👤👓👤

المعاهدة الثانية : الصبر ..
غالبيتنا ما عندنا تحمل وسعة خلق ، ممكن نكتم مرة مرتين ثلاثة ثم ننفجر ، وخاصة لو الطرف الآخر كالزوج مثلا محتك فينا طوال الوقت ، وفوقها أخطاؤه لا تعد ولا تحصى ، والمشكلة لما ننفجر ما يعذرونا إلا نادرا جدا ، مع إن انفجارنا ما جا من فراغ ، جا من بعد مواقف يمكن تقتل من شدتها ..

عشان كده لازم نفهم إن للصبر نوعين :
1. صبر تكليف : يعني أتكلف فيه وأشيل فوق طاقتي وأراكم فوق بعض إلين يصير جبال ، ثم تجي لحظة حاسمة وأفقد السيطرة على نفسي وأهدم كل شيء ، وياما قالولنا أهالينا اصبروا ومالكم إلا بيوتكم ونتذمر من هذي العبارة ..

حوار معتاد يدور في أغلب البيوت يبين معنى صبر التكليف :
الابنة : يعني ليش يا أمي ما تقولي لأبويا يوقف زوجي عن حده ؟ ليش بس أنا أصبر وأتحمل وأسكت ولا كلمة ولا نفس ولا حركة ؟! وهو حلال عليه كل شيء ! ..
أمي : يا بنتي كلنا صبرنا عالغلب ، والزوج الشين أحسن من الأخو الزين ، قد ما كان أخوك زين وطيب محا ترتاحي في بيته عند مرته وعياله ؛ لكن قد ما كان زوجك شين في النهاية أنت ساكنة في بيتك حرة ، تصحين وقت ما تبغين ، وتنامين وقت ما تبغين ، وتدورين في بيتك وتجرين ورى عيالك براحتك ماحد له شغل فيك ..

لكن الابنة لو اقتنعت بدا الكلام حتقتنع اقتناع نص نص ، وحترجع بيتها وحتصبر وتسكت ومرات تهاوش ومرات تتذكر نصيحة أمها ومرات تقاطعه بالأيام ومرات تعيش معاه أحلى ليالي عمرها وتحسب خلاص انتهت مشاكلها وفجأة اليوم الثاني تتصبح على نكد وهكذا ..

- - - - - - - - - - - - - - -

2. صبر تشريف :
هنا أنا أصبر برضايا التام ، محتسبة هذا الصبر لله ، وجزاء هذا الصبر مشرف وعظيم ، كل ما عمل زوجي عملة تزعلني على طول أتذكر إنه بصبري ( ربي يكفر ذنوبي ) ، يا سلاااااااااام ذنوبي تمحى لأني صبرت وما اشتكيت وعادي اليوم يمشي زي الحلاوة ..

جا زوجي يخاصم ويصرخ وشويا عيونه حتخرج من مكانها ؛ أصمت وربي حيدافع عني ، وأصبر عشان ( أكسب ثواب عظيم وجزيل ) ، لو الشوكة غزتنا أكيد حنتألم وحناخذ عليها حسنة ؛ فما بالنا بزوج يمكن يصبحنا ويمسينا بكلام وحركات ما تسر ؟! ..

لو حسيت زوجي متغير علي ، لا أستعجل وأسويله تحقيق ، أصبر وبصبري ( ارتقي منازل في الجنة ) ، لو بس أتخيلها مجرد تخيل والله يهون علي كل شيء ..

لو رحت السوق عشان اشتري لبس لي وزوجي ما خلاني آخذ راحتي وكل شوية يقولي بسرعة بسرعة بسرعة ومنكد علي ما بين تجريح وشتم ، أعطيه من الكلام الحلو وأصبر على حركاته ( الله يحبني ) لأنه ابتلاني بهذا الزوج ، وربي لو أحب عبدا ابتلاه ، يعني أيش أحلى من كده ؟! ..

لو منعني أروح لأهلي لفترة من الزمن لأي سبب كان واستنفذت كل السبل لاقناعه ، وصارت حياتي معاه قاب قوسين أو أدنى أصبر ( وحأدخل الجنة بحول الله من غير حساب ) ، بينما الخلائق في أرض المحشر خمسين ألف سنة يحاسبون على كل كبيرة وصغيرة عملوها ..

- - - - - - - - - - - - - - -

لما أي شيء يصدر من زوجي ويزعلني على طول أتذكر ( صبر التشريف ) ، حتهون علي أشياء كثيرة جدا مقابل :
1. ذنوبي تمحى ..
2. أكسب أجر ..
3. ارتقي منازل في الجنة ..
4. أطير فرحا بحب الله لي ..
5. أدخل الجنة من غير حساب ..

غير كده نحن نتعامل مع مين ؟ مع الكريم ، ربنا من عظيم كرمه حيعوضني في الدنيا إما بهداية زوجي ، أو بمال ، أو أولاد بارين ، أو بشيء كنت منتظرته من سنين ، وأكيد كلنا نعرف قصص كثيرة جدا توضح عاقبة الصبر في الدنيا قبل الآخرة ..

متدربة فاضلة في وحدة من الدورات كتبت : كانت أمي تتلقى كل صنوف الأذى من كل الناس إللي حولها ، من والدي وجدتي وعماتي ، واستمرت سنين وهي صابرة وساكتة ومحتسبة ، كنا نقولها ليش ما تردي ؟ ليش ما تاخذي حقك منهم ؟ ليش ساكتتلهم ؟ كانت مصرة على مبدأ الصبر ، ولكن بعد ما كبرنا كلنا أخذناها بعيوننا ، دحين هي الطفلة المدللة ، الكل يحرص على برها ورضاها ، صارت مرفهة لأبعد حد ..

ووحدة ثانية كتبت : قريبة لي ربي ابتلاها بزوج خائن خيانة غير طبيعية ، كل يوم وهو مع وحدة ، وهي في عز شبابها وعندها أربعة أولاد ذكور ، لكن تعبت نفسيتها منه وتركت البيت وأخذت أولادها معاها وعاشت في شقة ضيقة مافيها أدنى مقومات الحياة ، صبرت على أطفال مالهم ذنب ولا شكت ولا بكت وإللي يجيها من أخوها أو فاعليين الخير تمشي فيه حالها ، وكبروا الأولاد وصار فيهم المهندس والدكتور والطيار و..... ( نسيت ما أذكر وظيفته ) ، وعملولها فيلا كبيرة بكل خدماتها ، وعايشة حياة مرفهة معاهم لحد هذا اليوم ، والزوج ما زال للآن ما بين خائنات مثله وهو تعدى الستين سنة !! ..

- - - - - - - - - - - - - -

تتوقعي لما زوجك يلقاك تستقبلين صراخه بصمت ونظرة بريئة وأنت جواك صابرة ومستشعرة أجر الصبر ؛ هل حيبقى مثل ما هو ؟ أم حيتغير ؟! ..

ملاحظة : البعض فهم معنى الصمت يعني طول اليوم ما تتكلم ! تكلمي وخذي راحتك ، مقصدي لما يغلط عليك ويستفزك ويتهمك ويعايرك قابليه بالصمت عشان ما تكبر المشكلة وعشان ما تقولين له كلام بكرة حتندمي عليه ، وأشهر كلمة عبارة عندنا : طلقني أكرهك ما أبغاك ، صح ولا لا ؟؟ ..

👤👓👤👓👤👓👤

جواهر القعيطي ..
الدورة برعاية / عطورات جيني ..

.......................

تويتر وفيسبوك وانستجرام📲 @semfonias

تليجرام 📲

@semfonias4

للتسجيل في الجروبات

💟نائبة المديرة خوخة

00966567233958

شاركها في جوجل+